ތ. ގުރައިދޫ ކައުންސިލުން ޓީޗަރުންގެ ދުވަސް ކުލަގަދަކޮށް ފާހަގަކޮށްފި

ތ. ގުރައިދޫ ކައުންސިލުން އިސްނަގައިގެން އެ ރަށުގައި މަސައްކަތްކުރާ މުދައްރިސުންގެ އަގު ވަޒަންކުރުމުގެ ގޮތުން، ބައިނަލްއަޤްވާމީ ގޮތުން ފާހަގަކުރާ މުދައްރިސުންގެ ދުވަސް ވަރަށް ކުލަގަދަކޮށް ފާހަގަކޮށްފިއެވެ.

މި މުނާސަބަތު ފާހަގަކުރުމަށްޓަކައި ޚާއްޞަ ޙަފްލާއެއް ބާއްވާފައިވަނީ ތ. ގުރައިދޫ ކައުންސިލްގެ ރަށްވެހި މާލަމުގައެވެ. މި ޙަފްލާ ކުރިއަށްދިޔައީ މުދައްރިސުން ހެއްވާލައި، އުފާވެރި މާޙައުލެއް ޤާއިމުކޮށްދިން މަޖާ ތަފާތު ސެގްމެންޓްތަކަކާ އެކުގައެވެ.

މި ރަސްމިއްޔާތުގައި ގުރައިދޫ ކައުންސިލްގެ ރައީސް އަދި ނާއިބު ރައީސް ވާހަކަފުޅު ދެއްކެވިއެވެ. ދެ ބޭފުޅުންގެ ވާހަކަފުޅުގައިވެސް ވަނީ ދަރިވަރުންގެ ކުރިމަގު ބައްޓަންކުރުމަށާއި މުޖުތަމަޢު ބިނާކުރުމުގައި މުދައްރިސުން ކުރައްވާ ބުރަ މަސައްކަތްތަކަށް ވަރަށް ބޮޑަށް ތަޢުރީފުކުރައްވައި، އެ ފަރާތްތަކަށް އިޚްލާޞްތެރިކަމާއެކު ޝުކުރު އަދާކުރައްވާފައެވެ.

މީގެއިތުރުން، މުދައްރިސުން ތަޢުލީމީ ދާއިރާއަށް ކޮށްދެއްވާ މިންނެތް ޚިދުމަތްތަކާއި ބުރަ މަސައްކަތުގެ އަގު ވަޒަންކުރުމުގެ ގޮތުން ކައުންސިލްގެ ފަރާތުން ވަނީ ތ. އަތޮޅު މަދަރުސާގެ މުދައްރިސުންނަށް ޚާއްޞަ ހަނދާނީ ފިލައެއް ދެއްވާފައެވެ.

ގުރައިދޫ ކައުންސިލުން ބޭއްވި މި ޙަފްލާ ވެގެންދިޔައީ ރަށުގެ މުދައްރިސުންނަށް ބޮޑު ހިތްހަމަޖެހުމަކާއި އުފަލެއް ގެނެސްދިން، އަދި އެބޭފުޅުންގެ ޚިދުމަތްތައް ބަލައިގަންނަކަން ހާމަވެގެންދިޔަ ފުރިހަމަ ޙަފްލާއަކަށެވެ.